Iarratas ón gCúirt Dúiche ar Ordú lena síneadh an t-am le haghaidh comhdú

Tabhair faoi deara : Ní mór ionadaíocht dhlíthiúil a bheith ag cuideachta sa chúirt.

 
Céim a hAon – Dáta Cúirte a Fháil agus na Foirmeacha Cúirte a Chomhlánú

• Ní mór iarratas ar dháta cúirte, trí Fhoirm 93B.1 a chur isteach, a dhéanamh ar dtús chuig an gCúirt Dúiche ina bhfuil oifig chláraithe na cuideachta suite.
  Cliceáil anseo chun rochtain a fháil ar shuíomh gréasáin na Seirbhísí Cúirte.
• Ní mór don Fhoirm 93B.1 an tréimhse airgeadais atá i gceist, Dáta Tuairisceáin Bhliantúil (DBT) reatha na cuideachta agus an dáta a n-iarrtar ar an gCúirt síneadh ama a chur leis an tréimhse chun Tuairisceán Bliantúil na cuideachta a sheachadadh chuig an gCláraitheoir.
• Tabhair faoi deara : Is é an dáta i Mír 3 ar Fhoirm 93B.1 an dáta sínte nua faoinar gá don chuideachta an Tuairisceán Bliantúil a sheachadadh chuig an CRO chun comhdú in am. Agus an dáta seo á roghnú aici, ní mór don chuideachta dóthain ama a thabhairt di féin chun an Tuairisceán Bliantúil a sheachadadh chuig an CRO, toisc nach féidir ach Ordú amháin a dhéanamh in aghaidh na bliana Tuairisceáin Bhliantúla. Ní mór an dáta a bheith ina dháta i ndiaidh éisteacht na Cúirte agus i ndiaidh dháta seachadta an Ordaithe Cúirte chuig an gCláraitheoir.
• Is é an tréimhse ama a fhéadfaidh an Chúirt a shíneadh ná na 56 lá tar éis an ARD dá bhforáiltear in Ailt 343(2) agus (3) d’Acht na gCuideachtaí 2014. Iarrtar ar an gCúirt an tréimhse 56 lá seo a shíneadh agus níl sí ag athrú an ARD.
• Ní mór don Iarratasóir (oifigeach de chuid na cuideachta) nó don Aturnae thar ceann an Iarratasóra Foirm 93B.1 a shíniú. Ní mór ráiteas a bheith inti nár dhein an Chúirt Dúiche aon Ordú roimhe seo faoi Ailt 343(5) d’Acht na gCuideachtaí 2014 i leith na bliana Tuairisceáin Bhliantúil is ábhar don iarratas.

 
Céim a Dó – Fógra a thabhairt don Chláraitheoir & Litir ón gCláraitheoir

• Ní mór cóip den Fhógra Iarratais (Foirm 93B.1) ina bhfuil dáta agus am éisteachta na Cúirte a sheirbheáil ar Chláraitheoir na gCuideachtaí mar aon le cóip de Mhionnscríbhinn na cuideachta (Foirm 93B.2), rud a chuirfidh an Cláraitheoir ar an eolas de réir Alt 343(5) d’Acht na gCuideachtaí 2014.
• Is doiciméad tacaíochta é an Mionnscríbhinn (Foirm 93B.2) ina leagtar amach na cúiseanna a bhfuil an tOrdú Cúirte á lorg agus ní mór í a bheith faoi mhionn Stiúrthóir nó Rúnaí na cuideachta Iarratach. Ceanglaítear ar an Mionnscríbhinn míniú a thabhairt ar an gcúis nárbh fhéidir an Tuairisceán Bliantúil a ullmhú agus aon fhíricí a thacaíonn leis na cúiseanna nár seachadadh an tuairisceán chuig an gCláraitheoir in am a leagan amach agus a fhíorú.
• Ní mór an Fógra Iarratais (Foirm 93B.1) agus an Mionnscríbhinn shínithe (Foirm 93B.2), lena gcuirtear an Cláraitheoir ar an eolas, a sheachadadh chuig an CRO 21 lá ar a laghad roimh an dáta atá socraithe chun an t-iarratas a éisteacht sa Chúirt.
• Ba chóir na Foirmeacha seo, nuair a bheidh siad comhlánaithe, a sheoladh chuig districtcourt@cro.ie .
• Tar éis Foirmeacha 93B.1 agus 93B.2 a fháil sa CRO, eiseoidh an Cláraitheoir Litir chuig an láithreoir agus seolfar cóip di chuig an gCúirt Dúiche lena mbaineann.
• Forchoimeádann an Cláraitheoir an ceart agóid a dhéanamh i gcoinne aon iarratais a dhéantar chuig an gCúirt Dúiche ar shíneadh ama faoi Alt 343(5) d’Acht na gCuideachtaí 2014.
• Déanfaidh an Cláraitheoir agóid má bhaineann aon cheann de na himthosca seo a leanas:
  (1) ba cheart an Tuairisceán Bliantúil a bheith seachadta roimh an 1 Meitheamh 2015,
  (2) nach míníonn ná nach bhfíoraíonn na cúiseanna a tugadh san Aithris agus na fíricí tacaíochta, i dtuairim an Chláraitheora, cén fáth nárbh fhéidir an Tuairisceán Bliantúil a sheachadadh chuig an CRO laistigh den am a cheadaítear le hAilt 342(2) nó 343(3) d’Acht na gCuideachtaí 2014.
  (3) is cuideachta dhíscaoilte an chuideachta iarrthach.
  (4) gur fuair an chuideachta síneadh ama roimhe seo don bhliain Tuairisceáin Bhliantúil chéanna.
  (5) Más rud é go raibh an tréimhse airgeadais a luaitear i bhFoirm 93 B.1 ábhartha do Thuairisceán Bliantúil atá comhdaithe cheana féin leis an CRO.

 
Céim a Trí – Páipéir a thaisceadh leis an gCúirt Dúiche

• Ní mór Foirmeacha 93B.1 agus 93B.2 a thaisceadh leis an gCléireach Cúirte, mar aon le dearbhú reachtúil maidir le seirbheáil ar an gCláraitheoir agus an Litir ón gCláraitheoir, tráth nach déanaí ná ceithre lá roimh an dáta atá socraithe chun an t-iarratas a éisteacht.

 
Céim a Ceathair – Éisteacht na Cúirte agus deonú an Ordaithe Cúirte

• Tabhair faoi deara : Ní mór ionadaíocht dhlíthiúil a bheith ag cuideachta sa Chúirt.
• Forchoimeádann Cláraitheoir na gCuideachtaí an ceart ionadaíocht a bheith aige sa Chúirt Dúiche in aon chás ina ndéantar iarratas ar shíneadh ama chun Tuairisceán Bliantúil a chomhdú.
• Má dheonaíonn an Chúirt Ordú ag síneadh an ama chun comhdú a dhéanamh, taispeánfaidh an tOrdú (Foirm 93B.3):
  a) an dáta nua ar deonaíodh an síneadh ama chun an Tuairisceán Bliantúil a chomhdú.
  b) an dáta faoina gcaithfear an tOrdú Cúirte a sheachadadh chuig an CRO, is gnách go mbíonn sé seo 28 lá tar éis dháta na cúirte.

 
Céim a Cúig – An tOrdú Cúirte agus an Tuairisceán Bliantúil/na Tuairisceáin Bhliantúla a Sheachadadh chuig an CRO
Má dheonaítear Ordú a shíneann an tréimhse chun comhdú a dhéanamh, ní mór don chuideachta:

• Seol an tOrdú Cúirte (Foirm 93B.3) chuig an CRO laistigh den tréimhse ama a fhoráiltear san Ordú. Mura seachadtar an tOrdú Cúirte chuig an CRO laistigh den tréimhse seo a fhoráiltear, beidh an tOrdú neamhbhailí.
• Comhlánaigh comhdú Fhoirm B1 faoin dáta sínte.

 
Ba chóir a thabhairt faoi deara, má sheolann an chuideachta a Tuairisceán Bliantúil chuig an CRO go leictreonach, tar éis an dáta ar deonaíodh an síneadh chuige, go measfar go bhfuil sé déanach agus go mbeidh táillí comhdaithe déanach agus cailliúint díolúine iniúchta (más infheidhme) i gceist ar an ngnáthbhealach.

Má athraítear an dáta Cúirte bunaidh nó má chuirtear an cás ar athló, ní mór don chuideachta an Cláraitheoir a chur ar an eolas láithreach faoin dáta Cúirte nua.

Tabhair faoi deara : Ní mór do chuideachta ionadaíocht dhlíthiúil a bheith aici agus iarratas á dhéanamh aici chun na cúirte. Déantar an t-iarratas trí mhionnscríbhinn ar fhógra a thabhairt don Chláraitheoir.